QazUÝ-da Qytaıdyń ýnıversıtetimen ǵaryshqa mıkrospýtnık ushyryp, sýperkompıýter ornatý kelisimine qol qoıyldy, dep habarlaıdy Egemen.kz.
Memleket basshysy Qasym-Jomart Toqaev pen Qazaqstanǵa resmı saparmen kelgen QHR Tóraǵasy Sı Szınpınniń kezdesýinde ál-Farabı atyndaǵy Qazaq ulttyq ýnıversıteti men Qytaı Halyq Respýblıkasynyń Soltústik-Batys polıtehnıkalyq ýnıversıteti mıkrospýtnık arqyly ǵylymı-zertteýler júrgizip, ulttyq ýnıversıtette sýperkompıýter ornatý týraly kelisimge qol qoıdy.
Qazaqstan ǵalymdaryna derekterdiń úlken kólemimen jumys isteýge, memlekettik organdar jumysyn modeldeýge jáne elimizdiń IT ınfraqurylymyn damytýda mol múmkindik týǵyzady dep boljanyp otyrǵan sýperkompıýter jasandy ıntellekt tehnologııalaryn, ýnıversıtet qyzmetiniń negizgi baǵyttary boıynsha ǵylymdy qajetsinetin esepteýlerdi jasaýdy qamtamasyz etedi. Munymen qosa IoT-obektilerdi basqarý jáne uıymdastyrý, Smart-tehnologııalar obektilerin basqarý jónindegi baǵdarlamalyq qamtamasyz etýdi ázirleý úshin paıdalanylady. Ortalyq Azııadaǵy eń qýatty sýperkompıýterdiń joǵary ónimdiligi 1,94 PFLOPS.
Ulttyq ýnıversıtetpen mıkrospýtnık ushyrýdy josparlap otyrǵan Qytaıdyń Soltústik-Batys polıtehnıkalyq ýnıversıteti ǵarysh nanospýtnıkteri boıynsha kóshbasshy sanalady.
Birlesken joba aıasynda jer qyrtysy men mantııadaǵy tyǵyzdyq geterogendiligin anyqtaý úshin spýtnıktiń arnaıy jer stansııasy men taratqyshty qamtıtyn gravımetrııalyq ólsheý jabdyqtaryn ázirleýge baǵyttalyp otyr. Bul jumys úlken tereńdiktegi geodınamıkalyq úrdisterdi zertteýdiń negizgi mindetterin sheshýdi kózdeıdi. Taraptardyń pikirinshe, birlesken joba ǵaryshty zertteýge, bilikti mamandardy daıarlaýǵa jáne ortaq spýtnıkterdi ázirleýge jol ashady. Sonymen qatar mıkrospýtnık arqyly jerdi qashyqtyqtan zertteý jumystaryn júrgizýge mol múmkindik beredi.
Eki el ýnıversıtetteri ǵalymdary birlesip jasaǵan mıkrospýtnıkti ǵaryshqa ushyrý Shanhaı yntymaqtastyq uıymy jarııalaǵan Ekologııa jyly aıasynda jáne qara shańyraq QazUÝ-dyń 90 jyldyǵy qarsańynda josparlanyp otyr.
Búginde ál-Farabı atyndaǵy QazUÝ ǵaryshqa nanospýtnıkterdi ushyrý boıynsha tájirıbesi bar elimizdegi jalǵyz joǵary oqý orny. Búginge deıin oqý ordasy ǵarysh aılaǵyna «Al-Farabi-1» jáne «Al-Farabi-2» nanospýtnıgin ushyrǵan edi.